منه طفلة جميلة، بس المشكلة إنها ضعيفة علشان مش بتأكل أكل صحي كل يوم تصحى، تقول آه آه يا جسمي، يا أسناني، منه بتحب تلعب سباحة، كانت بتحلم تدخل بطولات في السباحة، وتاخد ميدالية فضية وكمان برونزية، لكن للأسف كل يوم المدرب يقول يا منه لازم نأكل كويس علشان نحقق أحلامنا، بس منه مكنتش بتسمع الكلام، وفي يوم منه تعبت جدا وفضلت تنادي يامامي يامامي أنا تعبانة، وراحت بسرعة للدكتور وسألها بتأكلي إيه يامنه خضار قالت لأ، يا منه بتأكلي لحمة قالت لأ، بتشربي لبن قالت لأ، طب يا منه حلمك إيه؟
ردت منه عليه وقالت أكون أشهر سباحة، رد الدكتور وقال تعرفي بقى إنك مش هتلعبي سباحة غير لما تأكلي أكل صحي، طب ياترى بقى يامنه تعرفي ايه هو الاكل الصحي؟
ايه هو الأكل الصحي ده يادكتور؟!
الأكل الصحي في حاجات كتيرة أوي زي اللحوم والخضروات والفواكه وكمان اللبن علشان أسنانك تكون قوية، عرفت منه غلطها فين ووعدت الدكتور إنها تكون قوية وتأكل أكل صحي، علشان ترجع للسباحة قوية، وفعلا من يومها منه بقيت بتأكل أكل صحي، وصحتها بقيت أفضل ورجعت للسباحة قوية ونشيطة ودخلت البطولة وخدت الميدالية اللي كانت بتحلم بيها..
