بقلم/ ياسمين إبراهيم
كان في بنوتة جميلة إسمها أمل، عمرها ٦سنين، وهي من ذوي الإرادة والهمم، كل يوم تعيط وتقول نفسي ألعب، نفسي أجري.
وفي يوم دخلت والداتها عليها أوضتها وسألتها مالك يا أمل دايما حزينه، ردت أمل يامامي تعبت نفسي ألعب وأجرى، نفسي أكون أشهر لاعبة سلة، بس إزاي هكون وأنا قاعدة على كرسي متحرك، فكرت شوية مامتها وردت عليها وقالت: عارفة ياأمل الآية القرانيه اللي بتقول، قال تعالي: ” وَكَانَ فَضْلُ اللَّهِ عَلَيْكَ عَظِيمًا ” صدق الله العظيم.
يعني يا أمل ربنا فضله علينا ونعمه كتير أوي أوي، وبعدين في أطفال كتير مش بتسمع ولا بتشوف، إنما إنتي بتسمعي وتشوفي وفي أطفال مميزين زيك كده، ردت أمل عليها وقالت: أنا مميزة يامامي، ردت عليها مامتها: طبعا يا أمل أنتي وكل طفل من ذوي الإرادة مميز.
وفي أطفال ومشاهير كتير أوي من ذوي الإرادة، أخدوا جوائز وتفوقوا في الرسم والموسيقى والكتابة، زي “إديسون” مخترع المصباح الكهربائي، و “لويس برايل” مبتكر طريقة برايل لتعليم الكتابة للمكفوفين، وكمان “بيتهوفن” أشهر موسيقى في العالم، و “طه حسين” عميد الأدب العربي، ومؤلف كتاب “الأيام” وكمان “دعاء الكروان” وكمان “جون ملتون” شاعر وعالم إنجليزي، و “هيلين كيلر” من مشاهير أمريكا، وكمان في شباب وبنات وصلوه لأحلامهم، زي “آية الله أيمن عباس” الذي حصلت على وسام الجمهورية وكانت أصغر سباحة وعمرها ١٦ عام، وكمان “صفاء طه” تمكنت من قراءة أكتر من ٥٠ كتاب في مسابقة تحدي القراءة وفازت بالمركز الثالث من بين ٨٥٠ طالب على مستوى الجمهورية، وكمان “محمد عوض” أتعرض لحادث سير وفقد القدرة على الحركة، وكان من ممارسي رياضة تنس الطاولة وكتير كتير أوي ياأمل من ذوي الإرادة.
عايزكي تعرفي حاجه كل طريق وفيه صعوبات وتحديات، بس الشاطر اللي يعافر ويوصل لهدفه، ويغلب يأسه، وكل الابطال دول وأنتي منهم، وكلنا قابلنا تحديات بس بنعيش بالأمل يا أمل، ضحكت أمل وقالت حاضر يامامي دايماً هقول الآية القرآنية اللي إتعلمتها منك وقت ما أحس باليأس، ردت مامتها عليها وقالت: مفيش يأس تاني بابا حضر ليكي مفاجأة، إشترك في نادي وهتلعبي سلة وهتحققي حلمك، وكمان هتكوني أشهر لاعبة من ذوي الإرادة، فرحت أمل وقالت بحبك يامامي وبحبك يابابا.
