بقلم :ياسمين إبراهيم
شادي وهادي كل واحد فيهم بيحب فريقه، ومتعصب لفريقه، شادي كان بيلعب في نادي الزمالك، وهادي كان بيلعب في النادي الأهلي، كانوا في فصل واحد، بس كل واحد فيهم بيكره التاني، وكمان كانوا متفوقين في دراستهم، ولكن كانوا على طول متخاصمين، حتى المدرب لاحظ وأخد باله من كراهية شادي لهادي.
وفي يوم أعلن النادي عن مباراة بين فريق الأهلى والزمالك، ووقف المدرب في نص الملعب وقال: إسمع ياشادي وإنت كمان ياهادي الفريق اللي هيفوز مش بس هياخد مبلغ مالي، كمان هياخد جائزة أفضل لاعب في الفريق، وهياخد الكأس، والفريق التاني كل لاعب هياخد كأس، وشهادات تقدير من النادي، إستغرب هادي وشادي وسألوا المدرب إزاي فريق خسران وياخد جوائز؟ رد المدرب وقال: دي قواعد اللعب يكفيهم شرف المحاولة والكرة مكسب وخسارة وكمان نسيت أقولكم إنك يا شادي وانت ياهادي مش هشتركوا في المباراة وده قراري، وقرار النادي إنفعل هادي وشادي وسالوا المدرب عن السبب رد وقال أخلاق الرياضي التعاون وعدم التعصب لفريق معين، إحترام الفائز والمحبة والمودة والتشجيع لبعض وكمان البعد عن العنف وللأسف مفيش حاجه من دول موجودة عندكم، لما تتعلموا أخلاق الرياضي ساعتها بس تدخلوا المباراة.
وبدأ شادي يقول لهادي هنعمل إيه أنت ليه بتكرهني، وأنت كمان بتكرهني، خلاص تعال نتفق نبقى أصحاب نحب بعض، ونتعاون مع بعض، واللي يفوز يفوز، المهم نكون أصحاب، وبعد فترة لاحظ المدرب عليهم تغيير، وسأل المدرب أصحابهم هو شادي وهادي مالهم ردت الأطفال وقالت شادي وهادي دلوقتي أصحاب، فرح المدرب جدا وبعت ليهم وطلب منهم الاشتراك في المباراة، وشكر شادي وهادي المدرب وقالهم المدرب: يارب نكون إتعلمنا وفهمنا أخلاق الرياضي، وبدأت المباراة وفاز فريق شادي وفرح فريق هادي جدا وفضلوا أصحاب يلعبوا مع بعض وقلوبكم على قلب بعض.
